टीकाप्रसाद भट्ट

रामेछाप – त्यसै त गुराँस र चिमालका थरीथरीका रंङ्गमा ढकमक्क सजिएको गमला जस्तो तामेडाँडा लोभ लाग्दो छदैथियोे । त्यसैमा पर्यटन पूर्वाधारको विकासले चिटिक्क हुने भएपछि स्थानीय फुरुङ्ग थिए । वेहुलीझै सिंगारिएको तामे हेर्ने, रमाउने र देखाउने स्थानीयको योजनामा भने संघीय सरकारले धोका दिएको छ ।

संघीय सरकार संग मिलेर उमाकुण्ड गाउँपालिकाले तामेडाँडाको विकास पूर्वाधारको निर्माण थालेको थियो । संघीय सरकारको ७० प्रतिशत र स्थानीय सरकारको ३० प्रतिशत लगानीमा करिव ४ करोडको पूर्वाधार निर्माण थालिएको तामेडाँडामा अहिले पूर्वाधार विकासको काम अलपत्र छन् । करिव ६० प्रतिशत जति काम भएपछि संघीय सरकारले पैसा नदिने जानकारी गरायो । उमाकुण्ड गाउँपालिकाका प्रमुख शेरवहादुर सुनुवारले भने – संझौता बमोजिमको काम नहुने भयो, संघीय सरकारले धोका दियो ।

संघीय सरकारको संस्कृति ,पर्यटन तथा नागरिक उडड्यन मन्त्रालयले हाल सम्म भएको कामको नाँप जाँच गरी भुक्तानीका लागि प्रकृया थाल्न र थप काम नगर्न भनेपछि तामेडाँडा सिगार्ने स्थानीय सरकारको सपना अधुरो हुने भएको छ । पालिका एक्लैले थालिएका योजना सक्ने अवस्था छैन् ।

सुनुवारका अनुसार सुरुमा तामेडाँडामा भ्यू टावर निर्माण गर्ने योजना थियो । ‘एकातिर भ्यू टावर निर्माण संस्कृतिको चौतर्फी विरोध भयो, अर्को तिर तामेडाँडा आफैमा भ्यू टावरनै भएकाले हामीले भ्यू टावर निर्माण गरेनौ’ सुनुवारले भने – बरु तामेमा पुग्ने पर्यटकहरुलाई सुविधा दिने उद्धेश्यले सुविधा सम्पन्न रिसोर्ट, यात्रा सहज वनाउनका लागि सिंढी निर्माण, सौचालय, बनभोज स्थल, स्तुपा लगाएतका पूर्वाधार निर्माण थालेका थियौं । ‘ति कामहरु कतिपय अझै अधुरै छन्, तर अव रोक्नुपर्ने अवस्था आईप¥यो ।

तामेको पूर्वतिर गुराँसघारी अनि विसाल चरणखर्क । हेर्दै मोहित बनाउने जमिनको मिलेको आकृति । मनोरम दृष्यावलोकन हुने तामेडाँडाको पाखै गुराँसको जङ्गलले सजिएको छ । गौरीशंकर हिमाललाई आँखाअघि सिधा देख्न पाउने मात्र हैन, नुम्बुर चुलि अनि पश्चिमको गणेश हिमाल सम्म देखिने हिमाली श्रृखलाले रामेछापको पूर्वोत्तर तामेडाँडाको सौन्दर्य बयान गर्न लायक छ ।

अघिल्ला बर्ष सम्म नयाँ बर्ष मनाउनका लागि गाउँ मात्र हैन जिल्लै छोडेर वाहिरीने उत्तरी रामेछापका बासिन्दा केहि बर्ष देखि त्यहि स्वर्गको टुक्रा टुपि तामेको थाप्लामा ओईरिन्छन् । ‘माघको अन्तिम हुन लाग्दा भर्खर फुल्न थालेको गुसाँसले आउदै गरेको नयाँ बर्षमा लोभलाग्दो लाली छरीरहेको हुनेछ’ स्थानीय टिकावहादुर श्रेष्ठले भने – जति हेरें पनि हेरिंरहु लाग्ने दृष्यले तामे पुग्नेलाई हम्मेसी फर्कन मनै लाग्दैन ।