रामेछाप । रामेछाप जिल्लाकै धेरै पूँजि र धेरै सदस्य रहेको मन्थली बचत तथा ऋण सहकारी संस्थाको २८ औं स्थापना दिवस आईतबार सम्पन्न भएको छ । संस्थाले स्थापना दिवसको अवसरमा आयोजित कार्यक्रमको जिल्ला समन्वय समिति रामेछापकी प्रमुख चिना खड्का कार्कीले उद्घाटन गरेकी थिईन ।

संस्थाका अध्यक्ष गोबिन्दप्रसाद घिमिरेको अध्यक्षतामा भएको उक्त कार्यक्रममा जिसस प्रमुख खड्काले मन्थली सहकारीले समाज रुपान्तरणमा गरेको योगदानको चर्चा गरीन् । उनीले सहकारीले अझै व्यवसायिक क्षेत्रमा लगानी केन्द्रीत गर्दै बचतकर्ताहरुको रकम पूर्ण सदुपयोग गर्नमा बढी ध्यान दिनु पर्नेमा समेत जोड दिईन् ।

कार्यक्रममा मन्थली नगरपालिकाका प्रमुख लव श्रेष्ठले मन्थली बचत तथा सहकारी संस्थाले सदस्यहरुको आर्थिक अवस्थामा सुधार ल्याउनका लागि विभिन्न क्षेत्रमा गरेका लगानीको सदुपयोग भयो भने नागरिकको आर्थिक सम्बृद्धि हुने र त्यसले समग्र स्थानीय सरकारलाईनै टेवा पुग्ने वताए ।

रामेछाप नगरपालिकाका प्रमुख लवश्री न्यौपानेले मन्थली बचत तथा ऋण सहकारी संस्थाले जिल्लामा अग्रणी सहकारीको भूमिका निर्वाह गर्दै आएको भन्दै संस्था ठिक ढंगले संचालन भएकै कारण हाल जिल्लामा सबैभन्दा ठुलो पूजि र सदस्य भएको संस्थाको रुपमा खडा भएको वताए ।

मन्थली १ का वडा अध्यक्ष रामहरी पौडेलले देशका विभिन्न सहकारीमा समस्या आएको सन्दर्भ निकाल्दै मन्थली बचतमा निर्धक्क भएर बचत गर्न सहभागिहरुलाई आग्रह गरे । जिल्लाका केहि साना सहकारीमा समस्या आएको भन्दै मन्थली बचतमा बचत गर्दा कुनै समस्या नहुने उनले दावि गरे ।

कार्यक्रममा नेपाल पत्रकार महासंघका केन्द्रीय सदस्य नबराज पथिक, जिल्ला अध्यक्ष दिपक घिमिरे, नेपाल बचत तथा ऋण सहकारी केन्द्रीय संघका रामेछाप शाखा प्रमुख सूर्य थापा, जिल्ला सहकारी संघका उपाध्यक्ष श्याम थापा, जिल्ला बचत तथा ऋण सहकारी संघका अध्यक्ष जगन्नाथ दाहालले मन्थली बचत तथा ऋण सहकारी संस्थाले जिल्लामा पु¥याएको योगदानको चर्चा गरेका थिए ।

कार्यक्रमका अध्यक्ष गोबिन्दप्रसाद घिमिरेले असाध्यै कठिन अवस्थामा स्थापना भएको मन्थली बचत तथा ऋण सहकारी संस्थामा हाल करिव १७ हजार सदस्य रहेको, संस्थाको कुल पूजि १ अरव ३७ करोड पुगेको, संस्थामा सदस्यहरुको करिव १० करोड शेयर लगानी र १ अरब ५ करोड बचत संकलन भएको र संस्थाबाट करिव ८० करोड ऋण लगानी रहेको उल्लेख गरे । उनले तामाकोशी सेवा समितिको अगुवाईमा मन्थली बचत र जिल्लाका अरु ५५ वटा बचत संस्थाको दर्ता र संचालन भएको प्रसंग उल्लेख गरे । बचत अभियानमा स्वर्गीय जगदीश घिमिरेले गरेको योगदानको समेत कार्यक्रममा चर्चा गरीएको थियो ।

संस्थाले स्थापना दिवसको अवसरमा उत्कृष्ट बाल बचतकर्ता, उत्कृष्ठ बचत कर्ता, उत्कृष्ट ऋणी र उत्कृष्ट कर्मचारीलाई पुरस्कार तथा सम्मान गरेको थियो । संस्थाले वातावरण संरक्षणमा जोड दिदै आफ्ना सदस्यहरुलाई विद्युतिय चुल्हो वितरण गर्ने कार्यलाई यो बर्ष समेत निरन्तरता दियो । गत बर्ष देखि संस्थाले उक्त अभियान संचालन गरेको हो ।

संस्थाको स्थापना दिवसकै अवसरमा युवा उपसमितिले शनिबार तामाकोशी अस्पतालमा रक्तदान कार्यक्रम गरेको थियो । नेपाल रेडक्रस सोसाईटी जिल्ला शाखाको प्राविधिक सहयोगमा भएको उक्त कार्यक्रममा १७ जनाले रगत दान गरेका थिए ।