काठमाडौं ।  पर्वतारोही प्रकाशराज पाण्डेलाई अर्जेन्टिनी हिमाल आरोहणको लागि प्रधानमन्त्री केपी शर्मा ओलीले नेपालको राष्ट्रिय झण्डा हस्तान्तरण गरी विदाई गरेका छन् ।

     प्रधानमन्त्री निवास बालुवाटारमा शुक्रबार आयोजित एक कार्यक्रममा प्रधानमन्त्री ओलीले पर्वतारोही पाण्डेलाई राष्ट्रिय झण्डा हस्तान्तरण गर्दै आरोहण अभियान सफलताको लागि समेत शुभकामना दिए । विश्वका सातै महादेशका सात अग्ला हिमाल आरोहण गर्ने अभियानमा रहेका पर्वतारोही पाण्डे दक्षिण अमेरिकी महादेशको सबैभन्दा अग्लो हिमाल अकोन्कागुआ आरोहणका लागि यहि जनवरी २० मा अर्जेन्टिना प्रस्थान गर्दैछन् ।

     प्रधानमन्त्रीले पाण्डेको अभियान सफलताको कामना गर्दै समाजमा सकारात्मकता फैलाउने युवाहरुको सबै अभियानमा आफ्नो साथ रहने प्रतिबद्धता समेत व्यक्त गरेका थिए ।

     रामेछाप लिखु तामाकोशी गाउँपालिकाको तिल्पुङका पाण्डेले सन् २०१६ देखि पर्वतारोहण सुरु गर्दै २०१८ मा विश्वको सर्बोच्च शिखर सगरमाथाको सफल आरोहण गरेका थिए । सगरमाथा, मनास्लु, आमादब्लम लगायत नेपालका विभिन्न हिमालको सफल आरोहण गरेका पाण्डेले सातै महादेशका अग्ला हिमाल चढ्ने अभियान अन्तरगत २०२४ को जुनमा युरोपको उच्च हिमशिखर माउण्ट एलब्रस आरोहण गरेका थिए । सोही वर्षको नोभेम्बर महिनामा अफ्रिकाको अग्लो चुचुरो किलिमन्जारो को सफल आरोहण गरेका थिए ।

     आफ्नो अभियानका माध्यमबाट जलवायु परिवर्तनका असरहरुका बारेमा पनि कुरा उठाउने र सरोकार राख्ने सबैलाई यसतर्फ ध्यानाकृष्ट गराउने गरेको पाण्डेले बताएका छन् । हिमाल आरोहणमा विशेष मानिने सेभेन समिट अभियानको क्रममा सातै महादेशका अग्ला हिमालहरुमा फहराएको नेपालको झण्डा नेपाली भूमिमै फर्किएर सगरमाथामा पुनः फहराउने पाण्डेले बताए ।