काभ्रे । असोजको दोश्रो साता आएको बाढीले क्षतिग्रस्त काभ्रेको पनौति जलविद्युत केन्द्रको उर्जा जलश्रोत तथा सिंचाई राज्यमन्त्री पूर्णवहादुर तामाङ ( कान्छाराम ) ले सोमबार निरीक्षण गरेका छन् ।
निरीक्षणका क्रममा बाढीले क्षतिग्रस्त आयोजनाको तत्काल मर्मत संभार गरी संचालनमा ल्याउनका लागि आवश्यक कार्य गर्न उनले निर्देशन दिएका थिए । मन्त्रालय र नेपाल विद्युत प्राधिकरणका अधिकारीहरु सहित केन्द्रको निरीक्षणमा पुगेका राज्यमन्त्री तामाङले नेपालको ऐतिहासिक आयोजना संचालन गरेर नमुनाको रुपमा राख्नु पर्ने वताएका थिए । तत्कालिन सोभियत संघको सहयोगमा राणाकालमा निर्माण भएको उक्त आयोजना मेघावाट क्षमतामा संचालन भएको तत्कालिन अवस्थाको सबैभन्दा ठुलो आयोजनाको रुपमा रहेको थियो ।
बिक्रम सम्बत १९९५ सालमा रोसी खोलाको पानी प्रयोग गरेर निर्माण गरीएको पनौति जलविद्युत आयोजनाले २ दशमलव ४ मेघावाट विद्युत उत्पादन गर्ने क्षमता राख्छ । उक्त आयोजना नेपाल विद्युत प्राधिकरणको स्वामित्वमा रहेको छ ।
