कमल साह
जनकपुरधाम, भदौ ९ गते । देव भूमि जनकपुरधामको उज्वल नक्षत्र मान्दै आएको श्री महावीर युवा कमिटी ले सप्तरीको धार्मिक नगर सखडा भगवतीमा शनिवार ५७ औं साधारण सभा सम्पन्न गरेको छ ।
छिन्नमस्ता भगवती मन्दिरको प्राङ्गणमा आयोजित साधारणसभाबाट महावीर युवा कमिटीले माता राजदेवीको पूजालाई व्यवस्थित बनाउनकालागि मूल पूजा समितिसंगै विभिन्न उपसमिति चयन गरेको छ ।
महावीरको अध्यक्ष अजय गुप्ताको अध्यक्षतामा आरम्भ भएको सधारण सभाले राजदेवी पूजाको मूल पूजा संयोजकमा रंजित भगतलाई चयन गरिएको छ ।
साथै विभिन्न नौ वटा उपसमिति पनि चयन गरिएको छ । त्यसमा ठेहा संयोजकमा अजित शर्मा, महाप्रसाद संयोजकमा दिपक साह, भव्य शृगार संयोजकमा प्रदीप साह, भजन संध्या संयोजकमा रंजन जयसवाल, मेला संयोजकमा रोशन कुमार साह, खोईछ भराई संयोजक तथा पार्क संरक्षण संयोजकमा विकास साह ( बिक्की), सरसफाइ संयोजकमा सुनिल राउत, रावन बध संयोजकमा ओमप्रकाश गुप्ता, बिजय दशमी तथा झाँकी संयोजकमा मोहन साह(हिन्दु) र लाईन व्यवस्थापन तथा खाना संयोजकमा शशी साहलाई चयन गरिएको छ ।
सो साधारण सभाबाट गत आर्थिक वर्षको आय व्यय पारित गरिएको छ । कोषाध्यक्ष चन्दन राज शर्माले आर्थिक आय व्यय प्रस्तुत गर्नुभयो । त्यस्तै अगामी आर्थिक वर्षको भावी रेखा पनि महासचिव चन्दन नागवंशीले प्रस्तुत गर्नुभयो ।