कमल साह
जनकपुरधाम,माघ ३० गते । वालिकालाई बलात्कार गरेको र गराएको आरोपमा प्रहरीले धनुषा जिल्लाबाट मुस्कान खातुन र शम्भु भनिने ओमनारायण यादव पक्राउ गरेको छ ।
प्रहरीका अनुसार मुस्कान खातुनले १३ वर्षकी बालिकालाई आफ्नै कोठामा ग्राहक बोलाई यौनधन्दामा लगाउने गरेकी थिइन् । खातुन लक्ष्मीनियाँमा एउटा कोठा भाडामा लिएर बस्दै आएकी थिइन् । त्यस क्रममा मुस्कानले यादव समेतलाई कोठामा बोलाई पीडित बालिकासँग यौन सम्बन्ध राख्न लगाएको प्रहरी ले जनाएको छ ।
पटक–पटकको बलात्कारपछि बालिका गर्भवती भएपछि घटनाबारे परिवारले थाहा पाएको थियो ।
प्रहरीमा जाहेरी परेपछि जिल्ला अदालतबाट पक्राउ अनुमति लिएर फरार रहेका खातुन र यादवलाई बिहीबार राति धनुषाको लक्ष्मिनियाँ गाउँपालिका वडा नम्बर– ४ स्थितबाट नियन्त्रणमा लिइएको धनुषा प्रहरीका प्रबक्ता मकेन्द्र कुमार मिश्रले बताएका छन । पक्राउ परेका दुबै जना स्थानीय हुन् । उहाँले घटनाबारे अनुसन्धान भइरहेको बताएको छ ।