कमल साह,
जनकपुरधाम, वैशाख ७ गते । लोकतान्त्रिक समाजवादी पार्टी नेपाल (लोसपा) ले धनुषा र महोत्तरी जिल्लागरी चार ठाउँका उम्मेदवारको नाम सिफारिश गरेको छ ।
लोसपाबाट उम्मेदवारको नाम सिफारिश हुनेमा दुई वटा गाउँपालिका,एक वटा नगरपालिका र एक वटा उप–महानगरपालिका रहेछ । तर, उपमहानगरपालिकाबाट एक–एक जनाको नाम होईन पाँच पाँच जनाको नाम सिफारिश गरेको छ ।
लोसपाको बैठकबाट धनौजी गाँपालिकाको अध्यक्षमा जिवेन्द्र झा लाई अध्यक्ष पदको लागि उम्मेदबारमा सिफारिश गरेको हो ।
लोकतान्त्रिक समाजवादी पार्टी नेपाल धनौजी गाउँपालिकाको पालिका स्तरीय भएको विस्तारीत बैठकबाट सर्वसहमतीले पार्टीका जिल्ला सचिव जिवेन्द्र झा लाई गाउँपालिकाको अध्यक्ष पदका उम्मेदवारमा सिफारिस गरेको छ ।
गत स्थानिय निर्वाचनमा जिवेन्द्र झा तत्कालिन राजपबाट निर्वाचन लडेका थिए । उक्त निर्वाचनमा झिनो मतले झा पराजित भएका थिए ।
त्यस्तै लोसपाले धनुषाकै औरही गाउँपालिकाको पालिका स्तरीय भएको विस्तारीत बैठकबाट जिल्ला उपाध्यक्ष प्रमोद यादवलाई अध्यक्ष पदको उम्मेदबार बनाउन सिफारिस गरेका छ । यादव जिल्लाकै प्रभावशाली नेता मानिन्छन् ।
उसैगरी लोसपा महोत्तरी जिल्ला अन्तगर्तको भंगहा नगरपालिको नगर स्तरीय बैठकबाट भंगहा नगरपालिकाको मेयर पदमा पुनः सन्जिब साह नाम सर्वसम्मतिबाट सिफारिस गरिएको छ ।
त्यसैगरी लोसपा नेपाल ले जनकपुरधाम उप–महानगरपालिकाको मेयर तथा उपमेयर पदमा पाँचपाँचजनाको नाम सिफारिस गरेको छ ।
जनकपुरधाम उमनपा नगर समितिका अध्यक्ष मनोज चौधरीको अध्यक्षतामा आईतवार बसेको बैठकबाट सो निर्णय गरिएको छ ।
उक्त बैठकबाट मेयर पदका लागि परमेश्वर साह, मनोज चौधरी, संजय कुमार चौधरी, अमर पंजियार र जानकी राम साह को नाम सिफारिस गरिएका छन् ।
उसैगरी उपमेयर पदका लागि पाँच जनाको नाम सिफारिश भएको छ । जिल्ला कार्य समिति धनुषाले सिफारिस गरेको नामहरुमा विभा ठाकुर, विभा पाण्डे, रिता कुमारी मिश्र, पुनम झा मैथिल र पुनम साह रहेको नगर अध्यक्ष मनोज चौधरीले जानाएका छन् ।
धनुषा जिल्ला अध्यक्ष समेत रहनु भएका प्रदेश सभासद परमेश्वर साहले मेयर तथा उपमेयर पदमा धेरै जनाको नाममध्ये पाँचजना मेयर र पाँचजना उपमेयरको नाम सिफारिस गरिएको जनाइएको छ ।