मिथिला जागरण समाचारदाता
जनकपुरधाम, पुस २८ गते । धनुषाको हँसपुर नगरपालिका बेल्ही स्थित यादव माध्यमिक विद्यालयको ७० औं वार्षिकोत्सव भव्यताका साथ मनाइएको छ ।
साइट नेपालका संयोजक अमित कुमार साहको अध्यक्षतामा भएको विद्यालयको वार्षिकोत्सव कार्यक्रमका प्रमुख अतिथि पूर्व त्रिभूवन विश्वविद्यालयका अध्यक्ष तथा पूर्व राजदूत प्रा.डा.महेन्द्र सिंहले जहानिया निरंकुश राण शासनको बेलामा यहाँका बुद्धिजीविहरुले विद्यालयमा जग्गादान र विद्यालयको स्थापना गरी शैक्षिक क्षेत्रमा दीप जलाउने कार्य गरेको बताएका छन् ।

उहाँले भन्नुभयो ‘शिक्षाबाट नै मानव जीवनमा उज्यालो ल्याउँछ । तर राणाशासनमा सबैलाई शिक्षा हासिन गर्न अधिकार दिएको थिएन । त्यस्तो बेलामा यहाँका बुद्धिजीवि यादवहरुले विद्यालयमा लगानी गरी यस क्षेत्रलाई नै शिक्षाको माध्यमबाट उज्यालो ग¥यो । उहाँप्रति हाम्रो नमन छ ।’

त्यस्तै हँसपुर नगरपालिकाका मेयर रामज्ञान मण्डलले नगरपालिकाले पहिलो प्राथमिकता शिक्षालाई र दोस्रो कृषि र रोजगारीलाई दिएको बताएका छन् । उहाँले हँसपुर नगरपालिका कृषि क्षेत्रमा आधारित भएता पनि पहिला शिक्षा र त्यसपछि कृषि अन्तरगत सिंचाई र सडक निर्माण कार्यमा बजेट विनियोजन गरेको बताएका छन् ।

उहाँले भन्नुभयो, ‘विद्यालयको भवन निर्माण, शौचालय, खानेपानी तथा सबै समुदायका बालबालिकाहरुको शिक्षामा पहुँच बढाउन आफूले भरपूर प्रयास गरेका छौं । मानव जीवनलाई खुशहाल बनाउन शिक्षा नै मूलमन्त्र हो ।’
कार्यक्रममा दाता परिवारबाट कृष्णदेव प्रसाद यादव, तेजनारायण यादव, धनु यादव, प्रदीप यादव, लख नारायाण यादव सहितका व्यक्तिहरुले आफ्ना विचार राखेका छन् ।
वि.सं. २००७ सालको परिवर्तनपछि बेल्ही गाउँका अग्रज बौजन यादव, महावीर यादव, रामेश्वर यादव लगायत पाँचजनाले करीब पाँच विघा जग्गादान गरी वि.सं. २००८ सालमा विद्यालयको निर्माण गरेको थियो । त्यतिबेला यादव मिडल ई.स्कूल राखिएको थियो, पछि त्यसलाई यादव माध्यमिक विद्यालय बनाइएको जानकारी गराइएको छ । यस श्री यादव मावि विद्यालयको ७० औ वार्षिकोत्सव भब्यताको रुपमा सम्पन्न भएको छ ।