कमल साह
जनकपुरधाम, भाद्र २५ गते । मिथिलांचलको घर घरमा आज चौठीचाँदको पूजाआर्चा गर्ने तयारी भईरहेको छ ।
चौठीचाँद पर्व मनाउनको लागि चिकनीको पात आवश्यक हुन्छ । जो प्रति पात दश रुपियाँसम्म विक्री भएको छ ।
चौठीचाँदको अवसर पारेर यसपाली केरा,नास्पाती,स्याउ,खिरा लगायतका फलफूल समेत अन्य दिनको अपेक्षा मंगो भएको हो ।
भाद्र शुक्ल पक्ष चतुर्थी तिथिमा शान्तिको प्रतिक चौठीचाँदको पूजा मिथिलांचलको घर घरमा आज मनाइने छन । चन्द्रमाको साक्षी राखेर घर मुलिले चिकनीको पातमा पुरी, खिर, केरा, नासपाति, स्याउ, खिरा, मकैको वाला लगायतका फल,दही र मिष्टान्न धुप दीपबाट पूजा गरिनेछ ।
चौठीचाँद मनाउनको लागि घरमुलिहरु विहिबार नहान खान गरेकी छन् भने शुक्रबार विहानदेखि निराहार रही साँझमा चन्द्रमा उदाए पछि प्रसादको लागि बनाएको परिकारको हात उठाउने छन् । चौठीचाँदको दिन फल हातमा लिएर चन्द्रमाको दर्शन गर्ने परम्परा रहेको छ ।