कमल साह
जनकपुरधाम,माघ ७ गते । मधेश सरकारद्वारा आयोजित ‘मधेश स्वाभिमान दिवस कार्यक्रममै जनमत पार्टीका नेता कार्यकर्ताहरुले विरोध जनाएका छन् ।
मधेश सरकारले यहांका महेन्द्र नारायण निधी मिथिला संस्कृति भवन सभाकक्षमा आयोजित कार्यक्रममा जनमत पार्टीका नेता कार्यकर्ताहरुले भ्रष्टाचार काण्डहरुको छानविन गर भन्दै विरोध प्रदर्शन गरेका छन् ।
२०७८ माघ ३ गते प्रदेशको नामाकरण ‘मधेश’ र राजधानी जनकपुरधाम पारित भएकोले प्रदेश सरकार स्वाभिमान दिवस मनाउन थालेको थियो ।
जनमत पार्टीका नेता कार्यकर्ताले मुख्यमन्त्री बेटी बचाउ बेटी पढाउ कार्यक्रम अन्तर्गत भएको साइकल खरिद, मुख्यमन्त्री स्वच्छता अभियान, जानकी मन्दिरको सौन्दर्यीकरण लगायतका भ्रष्टाचार काण्डहरुको छानविन हुनुपर्ने माग गरेका छन् । विरोध प्रदर्शनकारीहरु प्रदेश सरकार मुर्दाबाद, भ्रष्ट मुख्यमन्त्री मुर्दाबाद लगायतका नारा लगाएका छन् ।
मुख्यमन्त्री सरोज यादवले सम्बोधन गर्दै भन्नुभयो,‘जनमत पार्टीले सरकार भ्रष्टाचार गरिरहेको आरोप लगाइरहेको छ । यदि त्यस्तो हो भने किन जनमत सरकारमा छ । सरकार छाडे भयो नी ।’
उहाँले मधेश प्रदेश सरकारले विगतदेखि गर्दै आएको कामको सही मूल्यांकन हुनु जरुरी रहेको बताउनु भयो । प्रदेशको नाम मधेश र राजधानी जनकपुरधाम स्थापना गर्नकालागि आफ्नो भूमिकाको सवैले प्रशंसा गर्नुभएको बताउँदै उहाँले आफु मुख्यमन्त्री भएको एक बर्षमा कुन कुन कमीकमजोरी भएको हो त्यसलाई औल्यादिए आफूले करेक्सन गर्न पाउने बताउनु भयो ।
सो अवसरमा नेपाली कांग्रेसका संसदीय दलका नेता तथा भौतिक पूर्वाधार विकास मन्त्री कृष्णकुमार यादवले मधेश प्रदेशमा भौतिक संरचनामा व्यापक फड्को मारेको बिचार व्यक्त गर्नुभयो । उहाँले विगतका सरकारले एक संसदीय क्षेत्रमा ३५ किलोमिटर पक्की सडक बनाउने योजनाका लागि बजेट विनियोजन गरेको बताउँदै त्यसलाई छिट्टै कार्यान्वयनमा ल्याउन लागेको बताउनु भयो ।
गृह तथा सञ्चार मन्त्रालयबाट आयोजित स्वभिमान समारोहमा मन्त्री मोहम्मद समिमले मधेश प्रदेश सरकार गठन भएको एक बर्षमै जनताले गरेको विश्वासलाई हामी पूरा गर्न तर्फ अग्रसर भएको बताउनु भयो ।