रत्नहरी ढुंगेल

कति दिन अरूलाई दोष दिएर आफूलाई चोखो देखाउने ? कतिन्जेल पार्टीलाई अहंकार, गुटबन्दी र स्वार्थको खेल मैदान बनाउने ? के आफ्नै घर जलाएर उज्यालो खोज्ने हो त ? के नेपाली कांग्रेस रामेछाप तपाईंहरुको निजि खेल मैदान हो ?

लाख भन्दा बढी रामेछापका जनता , हजारौं क्रियाशिल सदस्यहरु, सयौं कार्यकर्ता र गाउँका सोझा सिधा कांग्रेसि जनको भावना बुझ्नुभएको छ ? उनिहरुले कति आशाको नजरले तपाईं हरुतिर हेरिरहेका होलान् तर तपाईंहरु कहाँ हुनुहुन्छ म म गर्नुस् । को छ यहाँ दुधले नुहाएको ? को उभिएको छ नैतिक तागतमा ? को हो आदर्शवान ? को - को हो । कस्तो हो । कति हो । कहाँको हो । कहाँ सम्मको हो । सबै - सबैलाइ थाहा छैन र ?

स्मरण रहोस् :- पद सधैं रहँदैन । शक्ति पनि सधैं रहँदैन । तर हाम्रा कर्मले भने इतिहासले लेख्छ । किन हामी लाजमर्दो इतिहास बनाउन उद्दत छौँ ? के कांग्रेस अब हाम्रो व्यक्तिगत महत्वाकांक्षाको भर्‍याङ मात्र हो ? भोलिको पुस्तालाइ कांग्रेस नबुझाउने आजै सकाउने ? कांग्रेस तपाईं हाम्रो मात्र पनि होइन है, हाम्रा अग्रज पुस्ताको रगत र पसिनाले सिँचेको, जेलनेल सहेको, बलिदानको आगोमा होमिएर निर्माण गरिएको संगठन हो तर आज के गर्दैछौं ? पद, स्वार्थ, र अहंकारमा चुर्लुम्म डुबेर जुँगाको लडाइँ लड्दैछौं ।

 ठिक छ लड्नुस तर एति स्मरणमा राख्नुस तपाईं हामी अजर अमर कोहि छैन । दिन आएपछि सबै जाने घाट नै हो । आज रिस रागको जोशले होस गुमाएर एक अर्कासंग लडिरहेका तपाईं हामिलाइ एक दिन नाङ्गै बनाएर आगोले दन दन डडाउँछन् है होशमा आउनुस । यो सबै लडाइँ झगडा निरर्थक छन् । यसको उपलब्धि शून्य हो र यसबाट सबैको पराजय सुनिश्चित छ । यहाँहरूलाई याद छ , द्वन्द्वका दिनहरू ? निर्दोष कांग्रेस कार्यकर्ता गोली खान बाध्य भए, अपहरणमा परे, जेलमा कुहिए । उनीहरूका नाबालक छोराछोरी टुहुरा भएका थिए । सम्झनु हुन्छ तिनिहरुलाइ ? कहाँ फुर्सद छ र अहिले त एक अर्कासंग लडेर सकिने हो नि ।

 सहिदका परिवार, द्वन्द्व पीडित , जेलमा यातना भोगेका , गाउँका निसकलंकित कांग्रेस सबैका आँखामा आज प्रश्न छन् जबाफ दिने तागत को संग छ ? यहाँ त पद, शक्ति, प्रभावको मात्र चिन्ता छ । कोहि अगाडि बढ्यो भने देख्न नसक्ने । पार्टीको कुनै एउटा साथी सफलताको एक सिँडी मात्र उक्लियो भने एक मुठी औषधि नखाइकन निदाउन नसक्ने मान्छे कसरी कांग्रेस विचारधाराको हुन सक्छ ? यो लडाइँमा कसैलाइ केही प्राप्ति हुनेवाला केही छैन सबैको क्षति हुनेवाला मात्र छ ।

अग्रजहरुले आफ्नो रगत र पसिनाबाट कमाएको पार्टी हो कांग्रेस । यो देश र जनताको सपना साकार पार्ने आधार हो । बलिदानको इतिहास बोकेको एक महान आन्दोलन हो । कांग्रेस आफैंमा एक परिवर्तन र विकास हो । यो कुनै व्यक्तिको, कुनै गुटको होइन हामी सबैको साझा घर हो । हामी सबै मिलेर कांग्रेसलाई उचाईमा पुर्याउनु पर्नेछ । त्यसैले अब सच्यौं, मिलौं । पद, प्रभाव, स्वार्थ भन्दा माथी उठौं , हामी हाम्रा कर्महरूलाई इतिहासले गर्वले लेख्ने बनौं । सहिदका परिवारको आँखाका आँसु पुछ्ने कांग्रेस बनौं, टुहुरा बालबालिकाका सपना पूरा गर्ने कांग्रेस बनौं, पीडितहरूको घाउमा मल्हम लगाउने कांग्रेस बनौं । हामी गुटको होइन, कांग्रेसको बनौं । मिलेर अघि बढौं । एक अर्काको सुभचिन्तक बनौं । गुठ भन्दा संगठनलाई माथी ठानौं । पार्टी संगठन भन्दा देशलाइ माथी लिऔं । गाली होइन, गलेर अगाडि बढौं । फुट होइन, जुटेर संगठन सुदृढ पारौं । एकता, समर्पण र संगठनको बलमा कांग्रेसलाई बलियो बनाऔं । नत्र इतिहासले कहिल्यै माफ गर्नेछैन , चेतनाको उत्कर्ष युगमा आउने भावी पुस्ताले सधैं गाली गर्ने, धिकार्ने नबनौं - जय नेपाल ।