रामेछाप । जताततै बन डडेलो लाग्न थालेको र बन संरक्षण हुन नसकेको कुरा उठीरहेको बेला रामेछाप नगरपालिकाले नगर क्षेत्रका सामुदायिक बनका पदाधिकारीलाई बनको संरक्षण र व्यवस्थापनका लागि अभिकरण गर्न अभियान थालेको छ ।

बुधबार रामेछाप नगरपालिका ७ , ८ र ९ का २५ वटा सामुदायिक बनका पदाधिकारीहरुलाई भेला गरेर नगरपालिकाका जनप्रनितिनिधि, कानुन विज्ञ र बन प्राविधिकहरु समेतले सामुदायिक बनको संरक्षण, सम्बद्र्धन, व्यवस्थापन र उपयोगको बारेमा अभिमुखीकरण गरेका थिए ।

बन डडेलोको सिजन भएकाले तत्कालै हरेक सामुदायिक बन समूहले आफ्नो समुदायको बनमा अग्नीरेखा र अन्य व्यस्थापनको काम गरीहाल्न कार्यक्रममा बन समूहका पदाधिकारीहरुलाई सुझाइएको थियो । त्यसैगरी रामेछाप नगरपालिकाले जारी गरेको बन ऐन २०८० मा भएका बनको व्यवस्थापन, संरक्षण, सम्बर्धनका साथै दण्ड सजाय समेतको पक्ष समेटेर कानुनी सल्लाहकार अधिवक्ता लोकहरी दाहालले उपभोक्ताहरुलाई सचेतना गराएका थिए ।

भंगेरी र सुकाजोर दुई बेग्ला बेल्लै स्थानमा भएका कार्यक्रममा रामेछाप नगरपालिकाका प्रमुख लबश्री न्यौपाने, उप प्रमुख बालकुमारी कार्की , डिभिजन वन कार्यालयका बन अधिकृत समिर पुन, रोजगार संयोजक बिजय बराल लगाएतले बनको ऐतिहासिक देखि वर्तमान अवस्था सम्मको अवस्थाको बारेमा चर्चा गर्दै पछिल्लो समयमा बनको रेखदेख, सफाई र उपयोग गर्न छोड्दा हिउँदका बेला बनले विनास निम्त्याएकोमा जोडदिएका थिए । उनीहरुले बन पैदावारको सदुपयोग गर्दा गाउँमै रोजगारी श्रृजना हुने र आर्थिक लाभ लिन सक्ने अवस्था रहेकोमा त्यस तर्फ आवश्यक कार्य गर्न उपभोक्ताहरुलाई आग्रह गरेका थिए ।

रामेछाप नगरपालिकाले मात्र नभै जिल्लामै यो प्रकारको अभिमुखीकरण कार्य गरेको यो पहिलो हो । यसलाई अन्य सामुदायिक बन र अन्य पालिकामा पनि फैलाएर उपभोक्तालाइ जागरुक बनाउनु पर्नेमा बन प्राविधिकहरुले जोड दिएका छन् ।