रामेछाप । मन्थली नगरपालिका ४ सालुको च्याँउकेढाँटीबाट रामेछाप नगरपालिकाको भालुखोप तर्फ जाने सडक रामेछाप नगरपालिकाको क्षेत्रमा मात्र निर्माण गर्ने गरी सघन शहरी तिथा भवन निर्माण आयोजना रामेछापले ठेक्का आव्हान भएपछि सालुका बासिन्दा आन्दोलित भएका छन् ।
कार्यक्रम र बजेट बमोजिम तोकिएको स्थानबाटनै सडक निर्माण गर्नुपर्नेमा मन्थली ४ सालुका बासिन्दाको माग रहेको छ । शहरी विकास मन्त्रालयले चालु आर्थिक बर्ष २०८१।८२ को कार्यक्रममा उक्त सडक निर्माणका लागि १ करोड रुपैयाँ विनीयोजन गरेको थियो ।
बिनियोजित बजेटको अधिनमा सडक निर्माण गर्नका लागि रामेछाप नगरपालिका वडा नम्बर ६ मा ओख्रेनी क्षेत्रमा मात्र काम गर्ने गरी आव्हान भएको उक्त ठेक्का पुनरावलोकनका लागि सालुका बासिन्दाले आयोजनामा बिहिबार निवेदन गरेका छन् । निवदेन गर्नेमा मन्थली नगरपालिकाकी उप प्रमुख ईश्वरी वस्नेत समेत रहेकी छिन् ।
सघन शहरी तथा भवन निर्माण आयोजना रामेछापका ईन्जिनियर शिवराम महर्जनका अनुसार कार्यक्रममा च्याउँकेठाँटी गाईटार भालुखोप सडक उल्लेख भएकाले उक्त क्षेत्र भित्रनै काम हुने वताउछन् । कार्यक्रमले लामो सडक समेटेको तर उक्त बजेटले सबै क्षेत्रमा एकै पटक काम गर्न नपुग्ने भन्दै यो बर्ष ओख्रेनी क्षेत्रमा काम गर्ने गरी ठेक्का आव्हान भएको महर्जनले वताए । रामेछाप नगरपालिकाका जनप्रतिनिधिहरुको सिफारीसका आधारमा उक्त योजनामा गर्नु पर्ने कामको नाप जाँच गरीएको उनले वताए ।
तर मन्थली नगरपालिका वडा नम्बर ४ का वडा अध्यक्ष राजन घिमिरेले कार्यक्रमको नाम बमोजिम सडकको प्रश्थान विन्दु अर्थात च्याँकेठाँटीबाटनै निर्माण कार्य हुनुपर्नेमा जोड दिए । कार्यक्रमले समेटने मन्थली र रामेछाप नगरपालिकाका सम्बन्धित वडाअध्यक्षहरुलाई राखेर पूर्व सहमति गरेर मात्र योजनामा काहाँ के काम गर्ने भन्ने कुराको निक्र्यौल गर्नुपर्नेमा कार्यालयले कुनै जानकारीनै नदिई ठेक्का आव्हान गरेको भन्दै घिमिरेले रोष प्रकट गरे । उनले उक्त ठेक्का रद्ध गरेर अर्को ठेक्का आव्हान गर्न आग्रह गरेका छन् ।
साविक जिल्ला विकास समितिले कृषि सडक कार्यक्रम अन्तरगत सालुको च्याँउकेठाँटी देखि भालुखोप सम्मको सडकको निर्माण गरेको थियो । उक्त सडकमा नाला, टेवा पर्खाल निर्माण गर्नुका साथै साँघुरो सडकलाई चौडा गर्ने र केहि अन्य पूर्वाधारको काम यो बर्ष हुन लागेको हो ।