रामेछाप – नेपाल बाल संगठन रामेछापको नाममा करोडौं मूल्य पर्ने जग्गा छ । तर उक्त जग्गाको बारेमा संगठनका पदाधिकारीलाइ जानकारी छैन । भाडामै दिने हो भने पनि मासिक लाखौं आउने जग्गा कौडी समेत नदिएर बर्षौ देखि अरुले प्रयोग गर्दै आएको छन् । सभा समारोह र भोज गर्ने थलो बालसंगठनको जग्गा भएको छ ।

रामेछाप बजार नजिकै संगठनको नाममा दर्ता रहेको साविक भंगेरी पञ्चायत वडा नम्बर ९ झ ५१७, ५२१, ५१९, ५२६, ५२९, ५३६, ५३४, २६१, ५३१ र ५३४ गरी १० कित्ताको कुल १४ रोपनी ६ आना २ पैसा ३ दाम जग्गा रहेको छ । उक्त जग्गा हाल गौरी शंकर क्याम्पस र बालमन्दिर आधारभुत विद्यालयले निशूल्क रुपमा प्रयोग गरिआएका छन ।

उक्त जग्गामा २ वटा साना भवन वनाएर संचालन हुदै आएको बालमन्दिर आधारभुत विद्यालय नेपाल सरकारको पूर्ण अनुदानमा संचालन भएको अन्य सामुदायिक विद्यालय सरहको हो । त्यसमा बाल संगठनको कुनै सहयोग छैन् । गर्दैन । बालसंगठनको नाममा रहेको जग्गामा संचालन गरीएकोले विद्यालयको नामै बालमन्दिर राखिएको मात्र हाे । नाम बालमन्दिर राखेर केहि व्यक्तिले त्यहिनै आफुले चलाएको विद्यालय हो भनेर बालसंगठनलाइ विवरण दिने गरेको आरोप पनि लाग्दै आएको छ । तर त्यसमा कुनै सत्यता छैन् । 

नेपाल बाल संगठनका पूर्व अध्यक्ष एवं समाजसेवि स्वर्गीय गोविन्दवहादुर श्रेष्ठले आफ्नो कार्यकालमा उक्त जग्गा खरिद गरेका थिए । रोपनीको ४ हजार ५ सय रुपैयाका दरले खरिद गरेको उक्त जग्गा रामेछाप बजार मध्येकै नामी जग्गामा पर्छ । रामेछाप वजार क्षेत्रमै त्यो जतिको राम्रो जमिन अरु छैन । रामेछापमा जिल्ला सदरमुकाम हुदै खरिद गरिएको उक्त जग्गा जिल्ला सदरमुकाम झरेपछि त्यत्तिकै अलपत्र परेकाे हाे । 

जिल्ला सदरमुकाम झरेपछि बालसंगठनको बैठकले अर्को व्यवस्था नभए सम्मका लागि गौरीशंकर माविलाइ उक्त जग्गा भोगचलन गर्न दिने निर्णय गरेको हो । प्रमुख जिल्ला अधिकारी र जिल्ला पञ्चायतका सभापति समेतको उपस्थितिमा भएको बैठकले जग्गाको भोगचलन गरे वापत कुनै शूल्क तोकेको थिएन । ‘चाहिएको बेलामा विद्यालयले छोड्ने गरी त्यो निर्णय भएको हो । निर्णयमा छाड्ने मिति तोकिएको छैन र विद्यालय संग कुनै संझौता भएको पनि छैन । गौरीशंकर माविलाई दिएको भएपनि उक्त माविले गौरीशंकर क्याम्पस संचालनमा उक्त जग्गा र सो मा निर्माण गरीएका भवन प्रयोग गर्दै आएको छ । गत बर्ष मात्र क्याम्पसको नयाँ भवन बनेको छ, तर पुग्ने र प्रयाप्त छैन् ।

बालसंगठनको नाममा रहेको उक्त जग्गामा संगठनको स्वीकृत विना विद्यालयको आन्तरिक श्रोत परिचालन गरेर ४ वटा र विद्यालयको नाममा नेपाल सरकारले उपलव्ध गराएको रकमबाट ३ समेत ७ वटा भवन निर्माण गरिएका छन् । संगठनले आफ्नो स्वामित्व खोजेको बेला उक्त भवनहरु के हुन्छन् भन्ने अन्यौल छ । बाल संगठनले छोड भन्दा छोड्नु पर्ने जग्गा भन्ने कुराको जानकारी हुदा हुदै त्यतिधेरै लगानी गर्नु हुन्थ्यो कि हुदैनथ्यो ? बहसको विषय बनेको छ । संगठनले आफ्नो जग्गाको बारेमा अहिले सम्म खोजविन नगरेको विद्यालय प्रशासनले जनाएको छ । बालसंगठन आफ्नो जग्गा खोजविन गर्न नआएका कारण विद्यालयले आफ्नो योजना बमोजिम जग्गाको उपयोग गर्दै आएको स्थानीयको बुझाइ छ ।

नेपाल बाल संगठन केन्द्रीय समितिले केहि दिन अघी मात्र रामेछाप ४ का सुन्दर घिमिरेलाई नेपाल बाल संगठन रामेछाप जिल्ला तदर्थ समितिको संयोजक चयन गरेको छ । संयोजक घिमिरेलाई संगठन विस्तार गरी अधिवेशन गराउने र संगठनको नाममा रहेका सम्पत्तिको खोजविन गरी व्यवस्थापन गर्ने जिम्मेवारी दिइएको छ ।

र