रामेछाप । लामो समय सम्म अधुरा रहेका विकास निर्माणको कार्य सम्पन्न गर्ने विषयमा जिल्ला प्रशासन कार्यालय रामेछापले सम्बन्धित पक्ष संग अन्तरक्रिया गर्ने भएको छ ।

प्रमुख जिल्ला अधिकारी श्यामकृष्ण थापाले अधुरा रहेका विकास निर्माणका योजनाहरु के गर्दा सम्पन्न हुन्छन् ? त्यस बारेमा सम्बन्धित आयोजनाका प्रतिनिधि बोलाएर छलफल गर्ने वताएका हुन् । बर्षौ अघी थालिएका स्वास्थ्य संस्था, सडक र अन्य पूर्वाधार अधुरो हुदा नागरिकले सेवा पाउन नसकेको गुनासो बढ्दै गएको थियो ।

सोमबार रामेछाप जिल्लाका संचारकर्मीहरु संग कुरा गर्दै थापाले जिल्लामा बजार अनुगमनलाई तिव्रता दिईने, तीन तहका सरकारका विचमा समन्वयलाई बढावा दिईने, ईन्धन अभाव हुन नदिन पहल गर्ने, यातायातका साधनलाई व्यवस्थित गर्ने, रामेछाप विमानस्थलबाट काठमाडौंको उडान संचालनका लागि सम्बन्धित पक्षमा अनुरोध गर्ने, विपत व्यवस्थापका लागि योजना बनाएरै काम गर्ने प्रतिवद्धता प्रकट गरे । त्यसैगरी विद्युत आयोजनाबाट पुरा गर्नुपर्ने सामाजिक उत्तरदायित्चवको क्षेत्रमा भए गरेका कामका बारेमा पनि जानकारी लिने र नगरेको पाईएमा गर्न लगाउने थापाले वताए ।

प्रजिअ थापाले नागरिकताको विषय कठिन र संवेदनशिल भएकाले समयमानै पाईएन भन्ने गुनासोको पछाडि केहि कारण हुन सक्ने हुदाँ स्थानीय प्रशासनले बुझेर मात्र नागरिकता जारी गर्ने कुरा उल्लेख गरे । नागरिकता सच्चाउने र दोहोरो लिन खोज्ने गरेका प्रसस्त उदाहरण रहेकाले प्रशासनले बेलामा नागरिकता दिएन भन्दा पनि बुझेर दिन केहि समय ढिलाई गरेको अर्थमा बुझ्न आग्रह गरे । सबै कागजात मिलेर आएको नागरिकता तत्काल उपलव्ध गराउने समेत उनले वताए । जिल्ला प्रशासन कार्यालयमा निशूल्क फाराम भर्ने काम रोकिएकोमा त्यसलाई फेरी संचालन ल्याउने तर्फ आवश्यक व्यवस्था मिलाउने थापाले वताए ।

सरकारी कार्यालयहरुमा रहेका सूचना अधिकारीलाई अद्यावधिक गराउने, सरकारी सवारी साधनको दुरुपयोग रोक्न कारण नखोलि जथाभावि पास नदिने प्रतिवद्धता पनि उनले जनाएका छन् । आईतबार मात्र रामेछाप जिल्लाको प्रमुख जिल्ला अधिकारीको रुपमा हाजिर भएका थापाले जिल्ला स्थित संघ संस्था, राजनीतिक दल, पत्रकार र व्यवसायीहरु विच परिचयात्मक कार्यक्रम राखेर रामेछाप जिल्लामा रहेका समस्याहरु सुन्न थालेका हुन् ।

उनले जिल्लामा देखिएका समस्या सबैको समन्वय र सहकार्यमा समाधान गर्ने र आफुले प्रजिअ छोडेर हिड्नु भन्दा अघी केहि न केहि नतिजा देखिने गरी काम गर्ने  कुरा पनि प्रजिअ थापाले संचारकर्मीहरु माझ राखे ।

तनहुँको प्रजिअ बाट सरुवा भएर आएका थापाले आफु संग स्थानीय, प्रदेश र संघीय कार्यालयमा काम गरेको अनुभव रहेको वताए । उनले सह सचिव भएपछि उनी कर्णाली प्रदेशमा प्रदेश सचिव र पोखरा महानगरपालिकामा प्रमुख प्रशासकिय अधिकृत भएर गरेका थिए ।