रामेछाप । रामेछाप नगरपालिकाले वडा नम्बर ६ को ओख्रेनीमा आईतबार सार्वजनिक सुनुवाई गरेको छ । नगरपालिकाबाट चालु आर्थिक बर्षको हाल सम्म भएका विकास निर्माण तथा सार्वजनिक सेवाका विषयमा उक्त सार्वजनिक सुनुवाई गरिएको हो ।

नगर प्रमुख लबश्री न्यौपानेको अध्यक्षतामा भएको उक्त कार्यक्रममा प्रमुख प्रशासकिय अधिकृत भोलाप्रसाद चापागाईले नगरपालिकाले सम्पादन गरेका विभिन्न विषयगत शाखा समेतका क्रियाकलापको प्रगति अवस्थाका बारेमा प्रकाश पारेका थिए ।

कार्यक्रममा स्थानीय नागरिक अगुवाहरुले नगरपालिकाबाट गरिएको अपेक्षा र हुन नसकेका विकास निर्माणको कामको बारेमा नगरपालिकाको ध्यानाकर्षण गराएका थिए । सार्वजनिक सुनुवाई कार्यक्रमकै अवसर पारेर भिडियो एक्सरे, महिलाहरुको पाठेघरको क्यान्सर परिक्षण, विभिन्न रोगको परिक्षण र औषधि वितरण, आयुर्वेद चिकित्साबाट विरामीको उपचार, सामाजिक सुरक्षा अन्तरगतका विभिन्न कार्य, किसानलाई तरकारीको विउ विजन वितरण, पशु औषधि र सेवा लगाएतका नगरपालिकाबाट सम्पादन हुने सार्वजनिक सेवा समेत संचालन गरिएको थियो । सयौं स्थानीय बासिन्दाले उक्त सुविधा लिएको नगरपालिकाले जनाएको छ ।

कार्यक्रममा नगरप्रमुख लबश्री न्यौपाने, उप प्रमुख बालकुमारी कार्की, प्रमुख प्रशासकिय अधिकृत भोलाप्रसाद चापागाई र वडा अध्यक्षहरु र विषयगत शाखाका प्रमुखहरुले सहभागिबाट आएका जिज्ञासाका सम्बन्धमा स्पष्ट पारेका थिए ।

रामेछाप नगरपालिकाले वडा तहमानै पुगेर सार्वजनिक सुनुवाई गर्ने र सोहि दिन घुम्ती शिविरको रुपमा नगरपालिकाबाट सम्पादन हुने सम्पूर्ण सेवा समेत प्रवाह गर्ने गरेको छ । यसअघील्लो सार्वजनिक सुनुवाई वडा नम्बर ९ मा भएको थियो ।