रामेछाप । रामेछाप र दोलखा जिल्लाको सिमा भएर बग्ने खिम्ती खोलाको पानी प्रयोग गरी निर्माणाधिन खिम्ती २ जलविद्युत आयोजनाको निर्माण अन्तिम अवस्थामा चलिरहेको छ । आयोजनाले अवको केहि अवधिमानै उत्पादन थाल्ने तयारी छ । पिपुल्स हाईड्रो कम्पनी प्रबद्र्धक रहेको ४८ दशमलव ८ मेघावाट क्षमताको उक्त आयोजनाले उत्पादित विद्युत केहि महिना भित्र केन्द्रीय प्रशारण लाईनमा जोड्ने तयारी गरेको हो ।

खिम्ती खोलाको पानीलाई रामेछापको रस्नालु र दोलखाको हावाको विचमा बाँध बाँधि दोलखामै पर्ने खिम्ती किनारमा निर्माण हुने उत्पादन गृहमा खसालेर ४८ दशमलव ८ मेघावाट क्षमताको विद्युत केन्द्रीय प्रशारणमा थप्ने लक्ष्य राखेर केहि बर्ष अघी देखि उक्त आयोजना निर्माणाधिन अवस्थामा थियो । आयोजनाले विद्युत उत्पादनमा प्रयोग हुने पानीलाई पुन खिम्ती खोलामानै खसाल्ने योजना राखेको छ ।

योजनाका मूल्य संरचनाहरु भूमिगत सुरुङ, पेनस्टक पाईपको जडान र उत्पादन गृहमा मेसिन औजारको जडान कार्य प्राय सम्पन्न भइसकेको छ । निजी क्षेत्रको उक्त आयोजनाले उत्पादन गरेको विद्युत नेपाल विद्युत प्राधिकरणले निर्माण गरेको न्यू खिम्ती सव–स्टेशन मार्फत केन्द्रीय प्रशारणलाईनमा जोडीने छ । उक्त आयोजनाले जिल्लाबासीलाई सुरुमा संस्थापक शेयर वितरण गरेको थियो ।

खिम्ती खोलाको पानी प्रयोग गरी २०५२ साल देखि व्यवसायीक उत्पादन थालेको खिम्ती १ जलविद्युत आयोजनाले अझै उत्पादन दिइरहेको छ । नर्बेजियन सरकारको लगानीमा निर्माण भएको उक्त आयोजना हाल नेपाल विद्युत प्राधिकरण र नर्बेजियन सरकारको आधा आधा हिस्सेदारीमा संचालनमा छ । ६० मेघावाट क्षमताको उक्त आयोजना सुरुमा डलरको भाउमा संझौता भएकाले विद्युत प्राधिकरणलाई भार थप्ने योजनाको रुपमा रहेको थियो । २५ बर्ष एकलौटी संचालन मुनाफा कमाएको उक्त आयोजना हाल प्राधिकरणको आधा भाग हिस्सेदारीमा संचालनमा छ । उत्पादन थालेको ५० बर्षमा भने उक्त आयोजना पुरै नेपाल विद्युत प्राधिकरणको स्वामित्वमा आउने वताइएको छ ।

खिम्तीकै पानी प्रयोग गरी रामेछापको गोकुलगंगा १ मा माथिल्लो खिम्ती जलविद्युत आयोजनाले १२ मेघावाट र उपल्लो खिम्ती जलविद्युत आयोजनाले ७ मेघावाट विद्युत उत्पादन गर्दै आएका छन् । उक्त दुवै आयोजना हिमालय उर्जा कम्पनीको लगानीमा निर्माण भएका हुन् । तीन बर्ष अघी देखि मात्र उक्त आयोजनाहरु व्यवसायीक उत्पादनमा आएका हुन् । चुचुरेको गर्जाङ्गमा रहेको सव स्टेशन मार्फत उक्त दुवै आयोजनाको विद्युत केन्द्रीय प्रशारणलाईनमा जोडिएको छ ।