रामेछाप । नेकपा एमालेको ११ औं राष्ट्रिय महाधिवेशनको लागि रामेछापबाट प्रतिनिधि छनौट सहमतिबाटै गर्ने प्रयास जारी छ । निर्वाचन कार्यक्रम बमोजिम शनिबार प्रतिनिधि छनौटका लागि मतदानको तालिका थियो । यद्यपी प्रतिनिधि छनौटका लागि एमालेले मतदान गर्ने मतदातालाई जिल्ला सदरमुकाममा निम्त्याएको छैन् । सहमतिबाटै प्रतिनिधि छनौट गर्ने मनसायले मतदाता नबोलाएको श्रोतको दावि छ । अहिले जिल्ला सदरमुकाममा केहि दिन देखि उमेदवारहरुका विच प्रतिनिधि छनाैटका विषयमा रस्साकस्सी चलिरहेको छ । 

मंसिर २७ देखि २९ सम्म काठमाडौंमा आयोजना हुने महाधिवेशनका लागि रामेछापबाट जम्मा १२ जना प्रतिनिधि चुनिने छन् । जसमध्ये खुलामा ६ जना, महिलामा ४ जना, युवा बाट १ जना र उत्पिडितबाट १ जना प्रतिनिधि हुने छन् । तर उक्त पदमा धेरैको आकांक्षा रहेको छ ।

नेकपा एमाले जिल्ला निर्वाचन कमिटीले सार्वजनिक गरेको उमेदवारको सूचि बमोजिम खुला तर्फको ६ प्रतिनिधि स्थान लागि ३४ जनाको उमेदवारी परेको छ । त्यसैगरी महिला तर्फको ४ प्रतिनिधि स्थानमा १५ जना, युवाको १ प्रतिनिधि स्थानमा १५ जना र उत्पिडितको १ प्रतिनिनि स्थानमा ३ जनाको उमेदवारी परेको छ ।

प्रतिनिधि जानका लागि दावि गर्नेहरुलाई छलफलमा राखेर सर्वसम्मत बनाउने प्रयासमा एमालेका पोलिटव्यूरो सदस्य तथा रामेछाप जिल्ला ईन्चार्ज कमलप्रसाद चौलागाई लगाएतका नेताहरु रात दिन खटिरहेका छन् । तर ५ दिन सम्म भएको प्रयासले अझै सार्थकता पाएको छैन् । उमेदवारहरुले प्रतिनिधि छनौटका लागि कार्यदललाई जिम्मा दिएका छन् । चौलागाईको संयोजकत्वमा रहेको कार्यदल शनिबार साँझ सम्म प्रतिनिधि छनौट गर्ने गरी अन्तिम कसरतमा रहेको वुझिएको छ ।

उमेदवारी दिने प्राय सवैले आफु प्रतिनिधिमा जानु पर्ने दावि नछोडेपछि पटक पटक भएका प्रयासहरु विफल हुदै आएकाे एक एमाले नेताले वताएका छन् । ‘निर्वाचन हुदैन, सहमतिमै कार्यदलले प्रनिनिधि टुंगो लगाउछ र त्यसलाई सवैले स्वीकार्ने वातावरण बन्नेछ’ ति नेताले भने ।