रामेछाप । मन्थली नगरपालिका १ का किसानहरुले मन्थली दुग्ध सहकारी संस्था र पशु प्राविधिकले गाईपालन र औषधिको अनुदान वितरणमा मनोमानी गरेको गुनासो गरेका छन् ।

प्रदेश र स्थानीय सरकारको ८० प्रतिशत अनुदान र गाईपालक किसानहरुले २० प्रतिशत लगानी गरेको रकमबाट सहकारी संस्था र पशु प्राविधिकले गाईनै पालन नगरेका किसानलाई अनुदान दिएको तर व्यवसायीक रुपमा गाईपालन गर्नेलाई अनुदानबाट बञ्चित गराएको गुनासो गरेका छन् ।

गाई र औषधिमा अनुदान वितरणका लागि गत आर्थिक बर्षमा प्रदेश र स्थानीय सरकारको ६६ लाख ६६ हजार ६ सय ६६ रुपैंया र किसानहरुले ४४ हजार ४ सय ६० रुपैयाँ रकम संकलन गरीएको थियो ।

बर्षौ अघी देखि व्यवसायीक गाईपालन र दुग्ध व्यवसाय गर्दै आएकी मन्थली १ कि किसान डुकुना पोख्रेल घिमिरेले दुग्ध सहकारी संस्थाका अध्यक्ष ध्रुब कुमार थापा र पशु प्राविधिक राजकुमार भारतीले वास्तविक गाईपालक किसानलाई अनुदानबााट बञ्चीत गराइएको गुनासो गरिन् ।

वडामा रहेका ३० जना गाईपालक किसानलाई अनुदान दिने कार्यविधि बनाएको र त्यसमा आफुले समेत दामासायीले रकम जम्मा गरेको, गाई खरिद र विमाको विल पेश गरेको तर अनुदान वितरणमा नपरेकोमा उनले रोष पोखिन ।

यसैविच मन्थली दुग्ध सहकारी संस्थामा विगत देखिनै अनियमिता रहेकोले त्यसमा छानविन गर्न र यस बर्षको अनुदान वितरणको कागजात झिकाई कानुन बमोजिम कारवाहिको माग गर्दै दुई जना किसानले जिल्ला प्रशासन कार्यालयमा उजुरी समेत दर्ता गराएका छन् । जिल्ला प्रशासन कार्यालयले किसानको निवेदन परेपछि अनुदान वितरण र सहकारीका कागजात झिकाउने भएको छ ।