काठमाडौं । रामेछापको मन्थली नगरपालिकाले काठमाडौंमा वसोवास गरेका अपाङ्गता भएका नगरवासीहरुलाई काठमाडौंमानै शिविर संचालन गरेर स्वास्थ्य परिक्षण तथा परिचय पत्र पुनारावलोकन गरेको छ ।

अपाङ्गताकै कारण नगरपालिकामा आएर सेवा लिन नसक्ने सेवाग्राहिलाई लक्षित गरी काठमाडौंको कोटेश्वरमा संचालन गरीएको दुई दिने शिविरमा मन्थली नगरपालिकाका विभिन्न वडामा स्थायी ठेगाना भएका ४६ जनाले अपाङ्गता परिक्षण गराएका छन् । साे शिविर शुक्रबार सकिएकाे हाे । 

मन्थली नगरपालिकाले असक्त अपाङ्गहरुलाई जिल्लामा ल्याउन र वसोवास रहेको काठमाडौंमा फिर्ता लैजान कठिनाई भएकोले काठमाडौंमानै स्वास्थ्य परिक्षण शिविर राखेको मन्थली नगरपालिकाकी उप प्रमुख ईश्वरी वस्नेतले वताईन् । काठमाडौंमा वसोवास गर्ने नगरबासीको सहजताको लागि यस अघी यस प्रकारको शिविरको आयोजना भएको थिएन् । जिल्लाका अन्य स्थानीय तहले समेत यस प्रकारको अभ्यास गरेको जानकारीमा छैन् ।

दुई दिने शिविरमा यसअघी परिचय पत्र नभएका अपाङ्गता भएका व्यक्तिहरु पनि आएका थिए । स्वास्थ्य परिक्षण गर्ने मन्थली अस्पतालका मेडिकल सुपरिटेन्डेन्ट डा. केशवसिंह धामीका अनुसार नगरपालिकाले काठमाडौंमा शिविर संचालन गरेर उनिहरुले धेरै राहतको महसुश गरेका छन् । धामीका अनुसार शिविरमा स्वास्थ्य परिक्षण तथा परिचय पत्र पुनारावलोकनका लागि ल्याइएका अपाङ्गता भएका व्यक्तिहरु गाडिबाट झार्न र चढाउन समेत धेरै समस्या हुने अवस्थाका भेटिए । रामेछापमा भन्दा पनि काठमाडौंमा रहेका अपाङ्गता भएका व्यक्तिहरु बढी संवेदनशिल अवस्थाका भेटिएका डा. धामीले भने ।

धामीका अनुसार स्वास्थ्य परिक्षणबाट यस अघि क बर्गको परिचय पत्र पाएका केहि ख बर्गमा झर्ने, ख का ग बर्गमा झर्ने अवस्था देखिएको छ । तर त्यस सम्बन्धि निर्णय भने नगरपालिकाकाे  सम्बन्धित समितिले गर्नेछ ।